Leygardagin 18. november gevur nótaforlagið Edition H. Eide gevur út nótabókina rura, rura • impressions • in a field við klaverstykkjum eftir unga tónaskaldið Eli Tausen á Lava.

Tey trettan klaverstykkini í bókini eru í sonevndum minimalistiskum stíli. Høvuðseyðkenni í minimalistiskum tónleiki eru repititión og variatión – ein støðug endurtøka av stuttum motivum (lagbrotum), sum alla tíðina broytast eitt vet, so tónleikurin hóast tær mongu endurtøkurnar ikki ”stendur í stað” men alsamt fer nýggjar leiðir.

Hjá Elii føri er úrslitið av hesum tónleikaleisti ein stillur, harmoniskur og ”hugsunarsamur” tónleikur, og skulu vit lýsa tónleikin við eittans orði, má tað vera ró – ein altfevnandi og myndskapandi ró.

Nótaútgávan fevnir um klaverstykkini á fyrstu talgildu tónleikaútgávuni hjá Elii, ”impressions” (Tutl, 2020), meginpartin av stykkjunum á næstu tónleikaútgávu hansara ”in a field” (Tutl, 2022) umframt stykkið ”rura, rura” (2019), ið byggir á vøgguvísuna, sum vit øll kenna.

Eli Tausen á Lava (f. í Havn 1997) tók bachelor-prógv í kompositión við Musikkhögskolan í Malmö, Lunds Universitet. Undan tí hevði hann tikið prógv á Musikkskúla Miðnámi í Havn, har Sunleif Rasmussen var lærari hansara. Í løtuni er Eli í holt við masterútbúgving í kompositión á New York University. Hann trein inn á føroyska tónleikapallin sum tónaskald í 2015 hevur síðan skrivað tilsamans eini fjøruti solo-, kamar- og orkesturverk.

Eli vann í 2019 sum fyrsta føroyska, ”klassiska” tónaskald fyrstu virðisløn á Faroese Music Awards.

Konsert og bókaframløga á Bókadøgum í Norðurlandahúsinum

Bókin verður løgd fram á eini stuttari konsert á Bókadøgum 2023 í Norðurlandahúsinum, har ungi klaverleikarin Jákup Tórgarð fer at spæla nøkur av stykkjunum í bókini, umframt eitt klaverstykki eftir Paula í Sandagerði.

Konsertin verður leygardagin 18. november kl. 14.30 og er ókeypis.

Bókin verður at fáa til keyps á Bókadøgum, og frá næstu viku í bókahandlunum kring landið.
Hon er 40 síður, 235 × 310 mm til støddar, og kostar kr. 199,00.

Triðja útgáva frá forlagnum

rura, rura • impressions • in a field er triðja nótaútgávan hjá forlagnum Edition H. Eide, sum Hugin Eide byrjaði í 2023. Fyrru útgávurnar er Klaverstykki í úrvali eftir Paula í Sandagerði og 35 svenskir sangir eftir Regin Dahl, í útseting hjá Hans Paula Tórgarð fyri tenor-baryton og klaver.