Hevur tú – ella onkur tú kennir – annað móðurmál enn føroyskt? Og hevur  hug at læra føroyskt betur? Nú verður møguleikin!

Várið 2024 bjóðar Miðnám á Kambsdali út skeið í føroyskum sum annaðmál. Føroyskt sum annaðmál fyri vaksin (hereftir nevnt FSA) er undirvísing í føroyskum máli og kunning um føroyska mentan og samfelag fyri vaksnar tilflytarar, sum ikki hava føroyskt sum móðurmál, so hesi klára seg í arbeiðslívinum ella í útbúgvingarhøpi í Føroyum

Upptøka til føroyskt sum annaðmál á Kambsdali verður grundað á eina upptøkusamrøðu. Byrjanarstøðið er, at tann lesandi hevur lokið grundskeið í føroyskum sum annaðmál í kvøldskúlaskipanini og hevur lítla eina hilling á føroyskum. Undirvísingin tekur atlit til mentan og fortreytir hjá tilflytarum, herundir veruleikan hjá tilflytarum í føroyska samfelagnum.

Undirvísingin fevnir umframt málundirvísing eisini um innlit í mentan og samfelagsviðurskifti. Útbúgvingin er skipað sambært námsætlan fyri føroyskt sum annaðmál (Føroyskt sum annaðmál (namsaetlanir.fo)) og endar við próvtøku. Útbúgvingin er í 4 stigum, og eftir hvørt stigið er ein stigroynd. Á Kambsdali byrjar eitt skeið á FSA 2-1 (stigroyndin svarar til CEFR A1) og eitt framhaldsskeið byrjar á FSA 2-3 (stigroyndin svarar til CEFR A2+).

Næmingurin lærir:

  • at skilja føroyskt
  • at tosa skilligt føroyskt
  • at lesa føroyskt
  • at skriva føroyskt
  • at kenna føroyska mentan og tær siðvenjur, sum hoyra til føroyska mentan
  • at kenna føroysk samfelagsviðurskifti

Útbúgvingin skal viðvirka til, at tilflytarar kunnu kenna seg sum integreraðan part av samfelagnum og viðurkendar á arbeiðsmarknaði og í felagslívi annars. Soleiðis skal næmingurin gerast betri førur fyri at gagnnýta útbúgving og førleikar, sum tilflytari hevur við sær úr heimlandinum ella at fara undir útbúgving í Føroyum, um ein ynskir tað.

Skeiðini er roknað sum fulltíðar skeið og eru millum 10 og 17 vikur long.

Byrjanarskeið 2.1: Undirvísingin er mánadag til fríggjadag frá kl. 11.55 – 15.05 á Miðnámi á Kambsdali. Byrjað verður umleið 22. januar. Skeiðið varar í umleið 10 vikur.

Framhaldsskeið 2.3: Undirvísingin er mánadag  til fríggjadag frá kl. 8.30 – 11.25 á Miðnámi á Kambsdali. Byrjað verður 8. januar. Skeiðið varar umleið 13 vikur

Undirvísingin er ókeypis, men næmingar mugu gjalda egnar lærubøkur.

Søk her – Melda til áðrenn 4. januar 2024.